God kamp av A-laget
Topplaget Norborg fekk stryk på Hellesylt stadion laurdag. Sunnylven vann 3-2 etter mykje godt spel, spesielt i andre omgang.
Det var Norborg som jubla for skoring fyrst, etter 15 minutt. Deretter vart det mykje kjemping og lite som stemte for laget som har overraska stort i årets 4. divisjon Sunnmøre. Sunnylven skora i tur og orden, eitt før pause ved Alf Ole Sundgot og to nye i andre omgang ved Bård Forbord på straffespark og Olav Åge Åsen på hodestøyt etter hjørnespark. Ei redusering for gjestane på straffespark etter 80 minutt fastsette sluttresultatet til 3-2 og fortent siger for Sunnylven.
Spelar utvist
Norborg opna kampen best i begge omgangar, men deretter var det Sunnylven som baud på dei store sjansane. Orangetrøyene frå Haram har problem med å hente poeng på Hellesylt stadion, og kampen laurdag var ikkje noko unnatak. Denne gongen sparka dei ikkje ballen på elva for å begrense tapet, men vart i staden redusert til ti mann det siste kvarteret etter to gule til Steffen Grytten.
Norborg var serieleiar før den 19 serierunden i 4. divisjon. Den posisjonen har Stranda innteke etter 2-1 siger over Bergsøy, og ei ”hjelpande hand” frå Sunnylven.