”Verkstedet” har fått nytt tak.

Det nye taket på ungdomsklubben ”Verkstedet” sine lokale i Hellesylt er på plass. Snart startar arbeidet med å ruste opp lokala inne i den to etasje store bygninga.
Marianne Fivelstad er leiar i Hellesylt Ungdomslag som har vore delaktig med å jobba fram tilbodet og dei nye lokala for ungdomen på Hellesylt. Ho er glad for at restaureringa er kome i gong, og håper at arbeidet inne kan helde fram snart.
Huset skal få full isolering, mellom anna i det nye taket. Før arbeidet med rominndelinga startar, skal rørleggar ordne vatn og avløp før vinteren set inn for fullt.

I bruk til våren
I fyrste høgda blir det gang, toalett, opphaldsrom og kjøkken. Det blir lokale for spel og prat, sosialt samvær med andre ord. I andre etasje blir eitt stort rom til diskotek og dans, fortel Marianne Fivelstad. Til det meste av snekkararbeid må dei leige inn fagfolk, men ho håper mange kan stille på dugnad når ein kjem til målararbeidet.
HUL-leiaren håper ”Verkstedet” kan stå ferdig til bruk ein gong før våren.