Juleavslutning etter ein god skulehaust
Ved Sunnylven skule var det avslutningsfest før jul sist torsdag. Svært mange møtte fram og fekk oppleve ei ny, fin feststund i bygda si storstove.
Dei to yngste klassestega var fyrst på scena der dei fortalde frå juleevangeliet og song julesongar. Ei stemningsfull opning frå dei 18 elevane i kvite kapper og med levande lys.
Meir livleg vart det då mellomsteget presenterte si dramatisering av forteljinga om «Kvitebjørn». Det enda godt slik dei aller fleste eventyr gjer.
At HUL-teatret kan sjå framtida ljost i møte viste også ungdomssteget. Også dei kom med ei frimodig framføring frå scena, om søppelkasting i naturen som enda i straff for dei som utførte ugjerninga.
Andre elevar fortalde frå skulehausten, frå turar i naturen og prosjektoppgåver i skule, alt ei bekrefting på at det har blitt jobba godt i «skulestova» frå alle.
Etter programdelen, som vart leia av lærar Ruth Hole Aaland, vart det mykje song og gong kring eit festpynta juletre, før ei ny gilde juleavslutnig vart avslutta med ei lita utlodding og servering.
