Hellesylt UL prega Fylkeskappleiken

Fylkeskappleik 2010 vart arrangert i Rauma kulturhus på Åndalsnes sist helg. Heile 27 av over 200 deltakar kom frå Hellesylt Ungdomslag.

Arne Inge Tryggestad – 20.04.2010 08:28:28

HUL var representert i fleire klasser, både tradisjonelle musikkinstrument, speling på lur og dans. Her er nokre resultat:

Klasse Gruppespel utan komp junior (fele) vann Hellesylt Ungdomslag med 93 poeng føre Ålesund kulturskole som fekk 80 poeng.

Klasse Lagdans junior delte Hellesylt Ungdomslag og Romsdalsmuseets Leikarring førsteplassen. Begge fekk 63 poeng.

Helge Kvam Karbø kom på 4. plass i klasse vanleg fele, solo, klasse C med 76 poeng. Det var ei jamn klasse der vinnaren var Niklas Støve Hammervold frå Rauma. Han oppnådde 83 poeng.
I klasse Pardans junior gjorde Hellesylt reint bord.
1. Kristin Ringdal og Jarl Vegard Eliassen, 75 poeng.
2. Kristin Ringdal og Kennet Hole, 74 poeng.
3. Nanna Frøysa og Kennet Hole, 65 poeng.
4. Anette Frøysa og Lars Kvam Karbø, 59 poeng.

Klassa for Eldre folkemusikkinstrument junior var det med to lag frå Hellesylt. Dei spela på lur og gruppa med fem deltakarar vann med 80 poeng føre dei med to som oppnådde 73 poeng.

I klassene Lagdans jenter og Lagdans gutar imponerte også Hellesylt UL. Her vart det ikkje utdelt poeng.

Søndag ettermiddag mottok alle premie frå scena i kulturhuset. Vinnarane i kvar klasse fekk kunstverk laga av Rauma-kunstnaren Åse Rangnes Søvik.

Neste år skal Fylkeskappleiken arrangerast i Valldal.