Markerte Barnehagedagen

Tysdag 20. mars vart Barnehagedagen 2012 arrangert for åttande gong. I Sunnylven barnehage starta dagen med mykje kreativt formingsarbeid saman med foreldre.

Det er Utdaningsforbundet og Fagforbundet for barnehagetilsette som i samarbeid står for markeringa av Barnehagedagen rundt om i landet. I Stranda er det lagt opp til ei felles samling på Storfjord kulturhus for alle dei sju barnehagane i kommunen om ettermiddagen tysdag 20. mars. Der deltek også eldste gruppe frå Trollhola i Sunnylven barnehage.
Før det vart dagen grundig markert i Sunnylven barnehage frå morgonen av med formingsaktivitetar saman med foreldra. Då vart lim og måling i alle fargar nytta kreativt av borna for å friske opp med nye dørskilt ved inngangsdøra heime.
Også mykje påskepynt skulle bli ferdig.

Hilde Langlo Brekke er inne i sitt 20. år som styrar ved Sunnylven barnehage.
-Å ha leiaransvaret kan vere utfordrande, ein kjem alltid fram i nye situasjonar, men det har også vore kjekt. I år markerer vi barnehagedagen med å invitere foreldra på formingsaktivitetar saman med borna for å vise korleis vi har det i barnehagen og kva vi driv med, seier Hilde Langlo Brekke.

Stranda kommune har ikkje markert barnehagedagen kvar gong dei siste åtte åra, men det skjer i år. I Storfjord kulturhus er alle barnehagar i kommunen representert om ettermiddagen under slagordet ”Det beste til dei minste”, og der blir innhald og arbeid i barnehagane presentert for dei som kjem innom mellom kl. 14.00 og 18.00.

Dei sju barnehagane i kommunen er:
Helstad barnehage,
Trollhaugen barnehage,
Sunnylven barnehage,
Geiranger barnehage,
Liabygda barnehage,
Tusenfryd barnehage,
Ringstad barnehage.