Første aksjonærsamling i Peer Gynt Galleriet
Det er sendt ut innkalling til ekstraordinær generalforsamling i Peer Gynt Galleriet AS. Første samling for den nye aksjonærgruppa blir i kunst og kultursenteret sine lokale på Hellesylt 1. mai kl. 14.00.
Under skipingsprosessen av nye Peer Gynt Galleriet AS har eit midlertidig styre med Øystein Ljøen, Ingunn Parr, Egil Røyrhus og Ole Arnstein Ringdal fungert.
219 aksjonærar med ein samla innbetalt aksjekapital på 2. 833.000,- kroner blir no kalla inn til første generalforsamling i selskapet gjennom e-post og brev.
På møtet blir eigarane invitert til å gjere vedtak om fastsetjing av vedtekter for selskapet, val av revisor, valnemnd og styre.
Framlegg til val klare
Til generalforsamlinga ligg det føre framlegg til nytt styre i selskapet med Øystein Ljøen som leiar, og med Ole Arnstein Ringdal, Per Magne Mork, Per Kjetil Parr, Marit Sæten og Lisbeth Lervik som styremedlemer.
Framlegget til valnemnd er John Langeland, valt for eitt år, Knut O. K. Hole, valt for to år og Ruth Hole Aaland, valt for tre år.
Som revisor gjer det midlertidige styret framlegg om at statsautorisert revisor Jens Arne Hagen blir valt.
Mange med røysterett
I vedtektene for Peer Gynt Galleriet går det fram at;
-Selskapet sitt formål er å eige og drive kunst og kultursenteret Peer Gynt Galleriet. Bevare kunsten etter Oddvin Parr på Hellesylt og alt som står i forbindelse med dette, herunder å delta i andre selskap med lignande virksomheit-.
Det er i alt 219 aksjonærar som har fått innkalling til generalforsamlinga. Kor mange som møter er uråd å vete, men datoen skulle vel passe for dei fleste etter som 1. mai er fridag, seier Øystein Ljøen. Han minner om at alle frammøtte har røysterett etter antall aksje dei har kjøpt, ein aksje på 1000,- kroner er ei stemme.
Under møtet vil Øystein Ljøen orientere om status for selskapet, om Peer Gynt Galleriet AS sin finansielle situasjon.
Det vil også bli lagt fram eit foreløpig driftsbudsjett for selskapet.
Festmiddag etter møtet
Etter generalforsamlinga vert det høve til å kjøpe middag, spekemattallerken med potetsalat. Desserten er sunnmørsk kakebord, og pris 250,- kroner.
Til festmiddagen ønskjer ein påmelding innan søndag 29. april til Randi Sæter, tlf. 416 71 818 eller e-post: randiseter@live.no