Kakesal for skuletur
Sal av boksar fulle av søte kaker er ei av inntektskjeldene når reisekassa skal fyllast opp til skuletur for elevane i tiande klasse ved Sunnylven skule.
I tussmørkret etter skuletid kom Terese Hauge og Irene Trøen Frøysa på salgstur med dragarvogn. Lasset i vogna var kakeboksar med Mormors doble Sjokoladeflarn og Lillebrors beste Karamellblanding, søte, gode kaker.
Heile 298 boksar med kaker hadde dei fått tilsendt, og alle dei elleve elevane i tiande klasse ved Sunnylven skule var ute på salsrunde denne kvelden.
I dragarvogna var det to mindre når handelen vår var over.
Overskotet av salet skulle gå til å finansiere skuletur til neste sommar. Etter planen skal den gå til Trondheim, fekk vi oss fortalt.