Auka utlån ved Sunnylven bibliotek

Marit Ljøen er styrar ved Sunnylven bibliotek. Ho har registrert auka utlån ved biblioteket som blir drive på innsamla middlar.

Då det var snakk om å legge ned biblioteket i Sunnylven viste folket både gjennom dugnad og pengegåver at dei ville behalde det.

No har det gått vel eit år sidan Sunnylven bibliotek flytta inn i lokale i Sunnylven kyrkjelydshus.
Utlån av bøker har auka jamt og trutt, seier Marit Ljøen. Folk spør etter alt, nokre vil ha krimbøker, andre les noveller eller romanar, andre er ute etter historiebøker eller fagliteratur. Sunnylven bibliotek har også eit godt utval av barnebøker som blir lese av mange.
Behovet for eit bibliotek i Sunnylven er til stades.

Sist tysdag var det førjulstreff med sal av kaffi, kaker og utlodding i Sunnylven bibliotek. Frammøtet var bra og både kaker og snurrelodd gjekk unna, og mange fekk med seg juleprega gevinstar heim. Juletreffet gav nær to tusen kroner til drift av biblioteket, noko leiinga var godt nøgd med.
Neste tysdag, 17. desember er det nytt førjulstreff i lokala til Sunnylven bibliotek.