Fekk heim sauer

Torsdag møtte vi sauebonde Gunnhild Foldal ved småbåthamna på Hellesylt, våt og kald, men glad. Ho hadde fått heim fem sakna sauer.

-Vi var på julehandel då vi fekk telefon frå to jægerar i Oaldsbygda. Dei hadde sett fem dyr nær sjøkanten om lag ein kilometer lenger ut i fjorden frå Oaldsbygda. Eg vart så glad, eg vart nesten rørt, seier Gunnhild.

Torsdag tok ho turen saman med Jan Ove Tryggestad og Per Kjell Leite for å finne og hente heim dyra. Sauene var av fleire som var sakna etter hovedsankinga tidlegare i haust.

-Der vi fann dyra og la til med båten var bratte fjellsida ned i sjøen. Fyrst fanga vi ein av dei vaksne og fekk om bord og då hoppa dei andre etter i båten. Det gjekk flott, fortel Gunnhild.

Framleis manglar nær hundre dyr, tre vaksne og resten lam for sauebøndene på Tryggestad.

-Det er nok siste året med sau på sommarbeite i Oaldsbygda for oss. I år har vi mista alt for mange dyr så lønsemda blir dårleg, seier Jan Ove Tryggestad og Per Kjell Leite. Dei har hamna sauene sine i Oaldsbygda dei siste år. At dei kunne hente heim fem av dei sakna dyra er dei glade for.