Kunstsenteret Peer Gynt Galleriet på Hellesylt kjempar for å overleve økonomisk. Årets sesong var av det dårlegaste i kunstsenteret si 12-årige historie.

Aksjonærane i Peer Gynt Galleriet AS var kalla inn til ekstraordinær generalforsamling søndag for å bli orientert om den vanskelege økonomiske situasjonen kunstsenteret er kome i. Utanom kafeteria og vestibyle rommar huset kunstnaren Oddvin Parr sine unike treskjeringar frå Peer Gynt.

Senteret har store økonomiske vanskar, sa styreleiar Ole A. Ringdal innleiingsvis. Han hadde langt frå gode tal til aksjonærane som søndag var representert med 2212 av totalt 3223 aksjar.

Omsetninga i 2014 gjekk ned med ein halv million kroner og kom ut med minus 519.000.- kroner, mot 408.000.- i raude tal i fjor. Det var ubetalte rekningar for rundt 500.000.- kroner og uteståande løn. Det var ein situasjon som no kravde grep og rask handling om senteret skulle reddast i bygda, sa styreleiaren.

Styret hadde sett på fleire løysingar og la fram forslag om sal av bygg, og sal av treskurdbilde på visse vilkår, at kunsten skulle bli hengande i galleriet som før, uansett kjøpar og drift.

Ringdal opplyste at styret hadde kjøparar på hand, både av bygget og kunst. Dei måtte berre ha aksjonærane si tilslutning til å gå vidare og forhandle.
Etter ein del diskusjon fekk styret den fullmakt dei bad om. Det vart gjort ei vedtektsendring som opnar for sal av bygg og kunst, og styret fekk fullmakt til å forhandle vidare med potensielle kjøparar.

Resultatet skal så leggjast fram på ny ekstraordinær generalforsamling for godkjenning eller ikkje.