Sel bygg og kunst
På ekstra generalforsamling i Peer Gynt Galleriet AS onsdag vart det vedteke å selje bygg og eventuelt kunst for å slette tyngjande gjeld.
I alt 2151 aksjar av 3223 var representert då aksjonærane i Peer Gynt Galleriet AS var samla til ekstraordinær generalforsamling i kunstsenteret på Hellesylt onsdag. På saklista stod sal av bygg, sal av kunst og val.
Styreleiar i Peer Gynt Galleriet AS, Ole Arnstein Ringdal orienterte om den vanskeleg økonomiske situasjonen selskapet var i. På aksjonærsamling før jul i fjor vart det lufta sal av bygget for å få ned lånegjelda. Det var også drøfta sal av kunst for å slette underskot i drifta for 2014, noko som vart vedteke på generalforsamlinga då.
I ettertid har styret selt fire treskurdbilete til Sparebanken Møre for to million kroner. Bileta som Sparebanken Møre har kjøpt er «Bukkerittet», «Verdsborgaren», «I Dovergubbens hall», og «Den grønkledde». Det er inngått avtale med Sparebanken Møre om at bileta framleis skal henge i kunstgalleriet. Peer Gynt Galleriet AS har forkjøpsrett ved sal av bileta.
Vedtok sal
Når det gjeld sal av bygget var det til no inga endeleg avklaring. Det meldte seg to kjøparar, Hellesylt Camping og Flo Eigedom, Stryn opplyste styreleiar Ringdal. Hellesylt Camping trekte sitt bod, Flo Eigedom var interessert i kjøp under visse forutsetningar til tre mill. kroner.
Under den ekstra generalforsamlinga onsdag vart det samrøystes vedteke å selje bygget med fem mål eigedom kring. Det vart også vedteke å tilby sal av seks bilete til om styret fann det naudsynt, mellom bileta var «Bøygen», «Mor Åses død» og «Den tredje korsvei». Einaste som ikkje kan seljast er «Bryllupet på Hægstad».
Val av nytt styre
Fleire i styret for Peer Gynt Galleriet AS ynskte avløysing på den ekstra generalforsamlinga, sjølv om det vart kommentert frå salen at styreval burde foregå på ordinær generalforsamling i mai. Valkomiteen hadde jobba fram eit nytt styremannskap. Styret vart ikkje fulltallig og vil bli komplettert med eitt medlem på ordinær generalforsamling.
Det nye styret er: Lena Parr, 1. år, Arild Ringdal 2.år, Jan S. Storstein 1. år, Randi Ansok 2. år. Styret konstituerar seg sjølv etter ordinær generalforsamling i mai.
Vil drøfte kjøp med styret.
Vidar Flo i Flo Eigedom var til stades under samlinga onsdag. Han har bod inne på kjøp av bygget for tre mill. kroner, eit bod som står ved lag under visse forutsetningar, seier han til hellesylt.info. Det må vere eit opplegg der drivarselskapet har inntening og kapital til å betale leige og andre driftskostnader lenger enn nokre månader, Utan dei forutsetningane er det lite interessant å gå inn og kjøpe Hægstad Gard seier Vidar Flo, Han ynskjer å drøfte detaljar kring eit kjøp med det nye styret.