Støttekonsert med «kommunalt artistgalleri»
Komande helg er det TV-aksjonen 2017 der innsamlinga går til organisasjonen UNICEF. I Stranda kommune er det meste klart, fortel komitemedlem Aud Tomasgard Berstad.
Søndag kjem bøsseberarar rundt i alle bygdelaga. I Sunnylven er det medlemer frå Hellesylt Ungdomslag som går frå hus til hus med innsamlingsbøsser.
Årets innsamling i Stranda startar alt på laurdag 21. oktober med støttekonsert i Geiranger kyrkje. Dit har komiteen sikra seg gode song –og musikkrefter, nærmast eit artistgalleri frå heile kommunen.
Konserten i Geiranger kyrkje startar klokka 15.00 laurdag. Og for tilreisande med ferja til turistbygda blir det høgdepunkt vert å få med seg. Ferjeturen inn Verdsarvfjorden er gratis denne dagen og har avgang klokka 12.30 frå Hellesylt. Der blir det underhaldning og kanskje overraskingar, får vi opplyst.
Programleiarar under konserten i Geiranger kyrkje er Maren Frøysa Os og Julie Mjelva , billettpris vaksne kr. 100.- born kr. 50.-. Turistferja Bolsøy går tilbake frå Geiranger til Hellesylt klokka 17.00.
Bli med på støttekonsert med mange gode aktørar, mellom anna frå Stranda kommunale kulturskule.