Laurdag 8. desember inviterte Heidi Melvoll Hauge til visning i sitt nye næringsbygg. Gavebuda på Hellesylt er lagt ned så no driv Heidi Søm-service i nytt bygg på Hauge.

-Eg er koma tilbake til der det starta, seier Heidi Melvoll Hauge. I 1985 vart bedrifta Hege Modeller etablert med lokale i eit kjellarrom på Hauge. Her vart det i starten produsert skjorteblusar. Etter kvart vart systova flytta til Hellesylt og fekk namnet Søm-service. I Hellesylt sentrum vart også Gavebuda etablert, butikk med gåveartiklar.

La ned Gavebuda

Grunna helsemessige årsaker bestemte Heidi seg tidlegare i år å legge ned butikken og satse på jobben bak symaskina. Arbeidsplassen ville ho ha nær bustaden sin og har no fått reist eit næringsbygg i tilknyting til heimen på Hauge i Sunnylvsbygda. Laurdag viste ho fram lokala til fleire som stakk innom og fekk seg spandert både kaker og kaffi.

Rystelsar i kjellardøra

Det nye bygget som er bygt saman med våningshuset har ei grunnflate på 80 kvadratmeter. Det er i to etasjar med lager oppe. Tomta var fjell som måtte sprengjast vekk, noko ein erfaren entreprenør tok seg av. Alt gjekk utan det minste uhell sjølv om sprenginga var tett inn til stovehuset til Heidi og Ivar. Det vart registrert større rystelsar på måleinstrumenta når Heidi kom heim og slo kjellardøra enn når dynamittsalvane gjekk av, fleipa entreprenøren frå Muldsvor Maskin. Bygget som er i betong og tre er sett opp av HT Bygg Hellesylt og har brannsikre glas, døre og innvendig tak.

Sel strikkegarn

No har Heidi jobben sin nærmast på heimebane med adresse Bygda 505. Og jobben er meir enn full av oppdrag der det stort sett er sying av gardiner det går i. Av og til må ho leige inn ekstra hjelp for å rekke leveringsavtalar. I dei nye lokala har ho også eit rikhaldig utval av garn, og ho kan tilby kjolar og andre klesartiklar som ho har sydd og strikka sjølv.

-Eg er veldig godt fornøgd med tomt –og byggearbeidet som er utført, og bygget har blitt ljost og triveleg å jobbe i slik eg håpa på. No kan eg gå på jobb og jobbe så mykje som helsa tillet, seier Heidi Melvoll Hauge.