Stor markering av kyrkjejubileum

Sunniva-koret og Hanne Krogh er mellom mange kjente aktørar som blir å høyre når Sunnylven kyrkje rundar 150 år i 2009. Jubileet for kyrkja startar med gudsteneste nyttårskvelden, og deretter blir det ulike markeringar til september.

Fleire personar og nemnder er i arbeid med planlegging av ulike arrangement.
Ei skriftnemnd jobbar med jubileumsskrift, og programnemnda har fått dei fyrste innslaga på plass.
I mars blir det konsert med Sunniva-koret og dirigent Per Oddvar Hildre, og under Sommardagar på Hellesylt blir det gjenhøyr med Hanne Krogh og lokale kor, fortel leiar i programnemnda Ruth Hole Aaland. Saman med Kristin Storstein, Astrid Ringdal, Bjarne Sjåstad og Svein Runde hadde dei sitt tredje møte nyleg der mange innslag var oppe til drøfting.

Hovedmarkering i september
Framleis er det mange lause trådar, seier ho, men at det skal bli ei stor og verdig markering av 150-års jubileet for kyrkja, er ho sikker på.
Som tidlegare meldt er det sendt invitasjon til Slottet og Dronning Sonja om å vere til stades i høve kyrkjejubileet. Avhengig av svaret der i frå blir sjølve jubileumsgudstenesta for Sunnylven kyrkje 13. september eller 27. september 2009.

I 1859 stod den nye Sunnylven kyrkje ferdig til bruk. Då hadde byggearbeidet pågått i om lag eitt år. Den store, kvitmåla kyrkja som er bygd i tre, har over 400 sitjeplassar, er 27 meter lang, og til tårnspissen er høgda heile 28 meter.
Kyrkja vart vigsla av biskop Kaurin, søndag 7. august 1859.