Stadionopning med snorklipping
Sunnylven IL sitt nye skiskyttaranlegg i Hyttehola vart offisielt opna med snorklipping og med avvikling av siste kretsrenn. Vel 100 utøvarar frå Sunnylven IL og klubbar i Sogn og Fjordane deltok.
Anlegget til vel 2.1 mill. kroner har vore i bruk denne vinteren, men vart fyrst offisielt opna laurdag med snorklipping og kretsrenn. Silkebandet i nasjonalfargar vart klipt over av to unge skiskyttarar frå nabofylket, Helene Støve Otterdal, Hornindal og Johan Eirik Mæland, Markane. Begge gjorde det svært skarpt under Hovedlandsrennet i skiskyting i vinter, med fleire pallplasseringar og medaljer av edelt metall.
Leiar i Sunnylven IL, Knut Dag Langeland orienterte om bygginga og anlegget, og frå Sogn og Fjordane skiskyttarkrets helsa leiar Marit Hjelle og gratulerte. Ho overrakte blomster til Rune Tryggestad i idrettslaget, eldsjela i arbeidet med realisering av kanskje det flottaste skiskyttaranlegg i Møre og Romsdal.