Fullt kyrkjelydshus med Joyful
Palmesøndag inviterte Joyful på tombola og konsert på Sunnylven kyrkjelydshus. Frammøtet viste at mange set pris på ungdomskoret.
Fredrik Stadheim – 28.03.2010 21:25:32
Vi hadde dekka på småbord til kring 80 personar, men det kom omlag det dobbelte. Det fortel leiar i styret for barne- og ungdomskora i Sunnylven, Hilde Langlo Brekke. Ho var imponert og overvelda over frammøtet. Å oppleve slik støtte er motiverande i arbeidet vidare, meinte ho.
Ved det eine langbordet gjekk det unna med matsal, pølse og brød, karbonade med stappe, kaffi og kaker. Og i andre enden av forsamlingslokalet var det loddsal på tombola. To driftige bestemødre, Inghild Storstein og Laila Røyrhus hadde stelt det heile i stand med 300 gevinstar. Nær halvparten hadde dei laga sjølve, og no stod dei der og selde lodd.
Alt var utseld då festen var over. Det kom inn 15.000,- kroner på tombolaen, eit beløp som i si heiltheit er øyremerka tur til Oslo og songfestival i 2011, sa Hilde Langlo Brekke.
