Rodde kyrkjevegen.
Før han sluttar som sokneprest og går til stillinga som prost i Austre Sunnmøre prosti, hadde Svein Runde bestemt seg for å gjere det prestane måtte gjere i eldre tid, ro frå Hellesylt til Geiranger.
Fredag la han i veg frå Hellesylt saman med fire konfirmantar i færingen til Erling Ljøen. Denne færingen har Svein Runde nytta også tidlegare. Fyrste gong var i 1963 på veg til Oaldsbygda. Dei køyrde med bil til Ljøen og der i frå rodde han og foreldra med den same færingen som dei gjer unna fjordturen med.
Motivasjonen for å ro dei to mila frå Hellesylt til Geiranger var på topp då dei la i veg frå Hellesylt kl. 10.00 fredag. Mykje god proviant vart lasta ombord og presten sjølv leita fram den gamle svarte prestekjolen med krage. Det var som i gamle dagar.
Veret var bra og rundt klokka 12.30 var dei ved Korsen omlag midtvegs i Geirangerfjorden. Der omkom eit stort brudefølgje i uver for mange år sidan. Her hadde dei oppdrag å skjerpe opp korsen i fjellveggen med måling og det vart gjort.
”Storekniven”, ein kraftkar frå Geiranger rodde fjorden på to og ein halv time som visst nok er rekord. Vi satsar på fem timar,- sa Svein Runde.