Skaut sin fyrste hjort

Hanne Kvamme har felt sin fyrste hjort. Det skjedde sist laurdag kveld då ei kolle fekk eit dødeleg skot midt i hjarteregionen.

Hanne Kvamme er ei av få jente som driv storviltjakt i lag med sju menn i området Hauge i nedre Sunnylvsbygda storvald.
Laurdag kveld sat Hanne på post saman med ein slektning og venta på at det skulle kome dyr inn på dyrkamarka. I skyminga kom ei fjorskolle og den måtte bøte med livet.

Vi var innom hjorteslakteriet på Hauge og Hanne fortel om sitt fyrste jakttrofè.
-Det kom ei kolle, men vi venta litt i håp om at det skulle kome fleire dyr, kanskje ein kronhjort. Den kom ikkje så då sikta eg på kolla og trykte av.
Det var fulltreffar midt i lunge/hjarteregionen, så dyret stubba etter fyrste skotet-.
Slektning Even Andre Bjørneset var med som kikrar og støtte for Hanne sidan det var fyrste gong ho jakta på levande dyr.
-Det var eit perfekt skot, ho var roleg og sa lite etterpå-, fortel han.

Hanne Kvamme har fått seg nytt våpen med kikkertsikte av sambuar Tore Rusten. I vinter tok ho jegerprøva med teori og oppskyting, og i august skaut ho opp til hjorteprøve.
Ho er klar for fleire timar på jaktpost om nokre dagar.