av 
Både laurdag og søndag har mange arrangement på Hellesylt. Det blir julemesse, tombola, adventsstund, julegrantenning, lysmesse og konkurranse i bygging av pepperkakehus.
Julemesse
Til julemessa på Hellesylt laurdag stiller 13 bedrifter og enkelpersonar, og i tillegg elevar frå 8. 9. og 10 klasse med diverse julebakst.
Vareutbodet på salsmessa er variert, lakseprodukt, natursåpe, husflid og bakevarer som lefser, flatbrød og strandabakelse.
Også eit stort bruktmarked av ski og skiutstyr blir bydd fram.
Det blir sal av kaffi, kaker og julegraut under messa som er opa frå 11.00 til 16.00.
Adventsstund
Laurdag er det også adventsstund på Sunnylven omsorgsenter der Sunnylven sanitetslag saman med tilsette byd på servering og litt underhaldning for pensjonærane.
Juletombola
Første søndag i advent arrangerer Sunnylven skulekorps juletombola på Sunnylven samfunnshus. Den tek til kl. 13.00 og varer til 15.15 då julegrana på Hellesylt blir tent til kjende juletonar frå Sunnylven skulekorps og med gang kring treet.
Også i år er det konkurranse i bygging av pepperkakehus. Under juletombolaen blir byggverka som kjem inn vist fram, og fire blir premiert etter loddtrekning. Det er fjerde året denne baketevlinga blir halden.
Lysmesse
Til slutt på søndag er det lysmesse i Sunnylven kyrkje ved vikarprest Nils Beite og song av ungdomskoret Joyful.
