Programmet klart for kaiopning
Om bord på cruiseskipet Empress håpa 900 passasjerar på overlandstur etter at skipet har lagt til kai på Hellesylt 17. mai. Den turen kan bli avlyst etter som vegen over Geirangerfjellet framleis er vinterstengt.
Som første cruiseskip på Hellesylt i år legg 210 meter lange MS Empress til Hellesylt kai i ti-tida på nasjonaldagen. Om bord er rundt 1800 reisande. Halvparten hadde bestilt tur om Stryn, Grotli til Geiranger, men turen gjennom storslagen natur blir neppe noko av. Vegen over Geirangerfjellet er framleis stengt.
Program for opning
MS Empress er første skip til den nye kaia og Stranda Hamnevesen KF har opningsprogrammet klart.
Opninga fell saman med feiringa av nasjonaldagen på Hellesylt som startar med gudsteneste i Sunnylven kyrkje kl. 09.00.
Frå kyrkja går skulekorps og folketog til kaia der det kl. 10.30 blir offisiell opning.
Det blir helsingar frå hamnesjef Rita Berstad Maraak og styreleiar i Stranda Hamnevesen KF, Per Erik Dalen, før ordførar Jan Ove Tryggestad opnar kaia offisielle med snorklipping. Deretter er det nasjonalsong før kapteinen på Empress får overrekt blomar og plakett som første cruisebåt ved kaia på Hellesylt.
NRK Tv sender direkte frå Hellesylt og opningsseremonien, og frå Peer Gynt Galleriet på 17. mai.
Kjært barn har mange namn, heilter det. Slik også med nye-kaia på Hellesylt som har blitt kalla cruisekai, djupvasskai, tonnasjekai og meir. Det offisielle namnet heretter er Hellesylt kai, seier hamnesjef Rita Berstad Maraak.