Opna kunstutstilling med Margrete Ringdal

Laurdag opna fyrste kunstutstiling i Peer Gynt Galleriet denne sommaren. Det var kunstnar Margrete Ringdal, Stranda som stilte ut 25 oljemåleri.

Margrete Ringdal har naturen som sitt myldreområde når ho skaper sin kunst. På turar, gjerne seint på dag og om kvelden blir ho inspirert, fangar inntrykk som ho formar til vakre bilete.

– Bileta er mørke i fargane, her er høge fjell og djupe fjordar, noko som bidreg til mystikk og mørkre i landskapet. Eg let fantasien få forme fram det ferdige arbeidet og der eg i bileta også plasserer både folk og blomar, sa Margrete Ringdal.
Utstillinga i Peer Gynt Galleriet tel 25 bilete og varer fram til 28. juni.

Glad i naturen
Det var Kari Hauso Stadheim frå kunst og kulturgruppa ved kunstsenteret som opna utstillinga laurdag.
– Margrete Ringdal med bestefar frå Sunnylven har brei utdanning som kunstnar og eig sitt eige galleri på Stranda. Eg veit at Margrete er glad i naturen og at den gjev inspirasjon til kunsten. Bileta gjenspeglar på ulike måtar naturen slik han er på desse kantar, varierande, storslått, stille og skiftande og slik han er sett med kunstnaren sine auge. Stemningar og kjensler mange kan kjenne seg igjen i.

Vaksne ”småkvedarar”
Rundt 50 personar var innom opninga laurdag. Der fekk dei også høyre song og musikkinnslag av to unge utøvarar frå Hornindal som går skule i Volda og på Sandane, Marie og Karina Haugen.
Begge var småkvedarar til Oline Løvlid i unge år, men har no blitt vaksne og framførte vakkert ”Danse mot vår” og ”Kom sommarvind”.

Kunstlotteri
I samband med utstillingane i Peer Gynt Galleriet er det oppretta eit kunstlotteri. Til den fyrste utstillinga kan ein kjøpe lodd på bok i kunstsenteret og bli med på trening av gevinsten som er ei samling på tre bilete av Margrete Ringdal.
Liknande lotteri blir halde ved dei andre utstillingane i sommar.