av 
På fredag kveld spleisar lokale song og musikkrefter og profesjonelle utøvarar seg saman til ein spanande konsertoppleving i Peer Gynt Galleriet på Hellesylt. Inntekta går uavkorta til digitalt piano til kunstsenteret.
Det er kulturgruppa ved kunstsenteret som er arrangør av konserten der det beste av lokale krefter går saman med pianist Helge Lilletvedt, ein anerkjent og topp musikar på tangentinstrument.
For nokre år tilbake akkompagnerte Helge Lilletvedt lokale utøvarar i suksesskonsert med Lina Sandell-salmar, og han gav tonefylje til Herborg Kråkevik sin Sommardagkonsert på Hellesylt i 2001.
Frilandsmusikaren og komponisten med klassisk klaverutdanning har sin betre halvdel frå Hellesylt og er for tida på ferie der. Til konserten fredag stiller han gratis opp for å bidra til det økonomiske ved kjøp av digitalt piano til kunstsenteret på Hellesylt.
På dugnadskonserten stiller også teologistudent Morgan Berg, prestevikar i Sunnylven og Geiranger. Berg er medlem i Oslo domkor og har ei flott songrøyst. På repertoaret kan bli lette amerikanske salmar, musikal eller begge deler å høyre til tonefølge frå Helge Lilletvedt.
Men bygda har også eigne song og musikkrefter som har begeistra ved ulike høve. Kristin Storstein og Oddbjørg Stadheim stiller også på ”pianodugnaden”. Dei syng det meste og kjem med fleire songar, både som solo og felles framføringar.
Elevar frå kulturskulen i Stranda er fleire. Mange er reist på ferie, men fredag får vi høyre både musikk og song frå Anne Grete Kjellstadli Langleite, Simen Frøysa Hellebostad, Olene Lade og Veronica Jansen.
Arrangøren håper på godt frammøte fredag 12. juli kl. 19.30, eit arrangement som har både variasjon og kvalitet over seg. Inngang kostar kr. 200.- for vaksne og kr. 100.- for born. Billettsalet går uavkorta til kjøp av digitalt piano ved Peer Gynt Galleriet, til glede både for song og musikklivet og alle andre i Sunnylven.
