Sunnylven/Stranda 2 leia 2-0, men tapte

Langevåg sikra opprykk til 4. divisjon med siger 4-2 over Sunnylven/Stranda 2 på Hellesylt stadion onsdag kveld.

Langevåg var serieleiar i 5. divisjon då laget gjesta Hellesylt stadion onsdag kveld for å spele mot Sunnylven/Stranda 2. Etter kampslutt kunne dei gulkedde juble over at opprykk til 4. divisjon var i boks.

For Sunnylven/Stranda 2 tapte kampen 2-4 etter å ha leia 2-1 ved pause.

Det vart to ulike omgangar av heimelaget i møtet med Langevåg på stadion onsdag kveld. I fyrste halvdel var Sunnylven/Stranda 2 like gode som tabelleiaren etter at Henning Frøysa hadde donka inn to mål, etter 22. og 30. minutt.
Fire minutt ut i ei uforståeleg tilleggstid i fyrste halvdel skalla Sebastian Nordal inn reduseringsmålet for Langevåg, ei skåring som verkeleg tente laget.

For i andre omgang dominerte gjestane totalt. Stor fart og presisjon i samspelet viste kvifor laget har toppa 5. divisjon gjennom heile sesongen.
Sebastian Nordal banka inn nye mål etter 60. og 61. minutt, og Daniel Grande sikra opprykksjubelen med ny skåring i det 88. minutt.

Sunnylven/Stranda 2 kjempa tappert, men fann ikkje kvarandre. Det vart i staden fleire gule kort frå domar Oddbjørn Aam til spelarar på laget, mellom anna fekk tomåls-skårar Henning Frøysa sitt andre midtvegs i omgangen og dermed tidleg dusj.

Sunnylven/Stranda 2: 2-4 (2-1)

Sunnylven/Stranda 2:
Radovan Dvorsky, Per Ove Frøysa, Robert Tryggestad, Endre Kjølås, Bård Forbord, Ole Arnstein Ringdal, Jørgen Helset, Eivind Louis Helset, Andreas Espelund, Gunnar Espelund, Henning Frøysa.
Innbyttarar:
Leif Rune Tryggestad, Kaminsky Premyslaw.