Støypte bru på skogsvegen

På den nye skogsbilvegen på Hellebostad i Sunnylven vart ei ny bru over ein større bekk støypt fredag. Jølbrua skal tole 13 tonn akseltrykk.

Det er fem grunneigarar på Hellebostad som har gått saman om å ruste opp og delevis bygge ny veg i Hellebostadskogen.
Vegen på 600 meter er snart ferdig og vil utløyse mykje hogstmoden skog. Fredag vart ei ny betongbru over ein større bekk støypt. Om to veker kan hogstmaskina og andre køyretøy passere og starte arbeidet med hogging og uttransport av kring tusen kubikk granskog.

Alt neste veke er hogstmaskina på plass for å starte høgging og rydding i nærleiken av Stadheim kraftstasjon, fortel skogeigar Olav Hellebostad. Der ligg mykje vindfall etter orkanen Dagmar så der vil rundt 400 kubikk bli teke ut, det meste til massevirke.

Den nye skogsvegen blir i tillegg til uttransport av tømmer ein flott turveg mellom gardane Hellebostad og Åsen.