Gudsteneste på Massing-Andersplassen

Saga Emilie vart døypt på Massing-Andersplassen i Åsen Kristi himmelfartsdag. Liturg Helge Standal, Sykkylven var vikarprest og utførte dåpshandlinga.

I varmt og vakkert vårver samla kring 80 personar seg tradisjonen tru til gudsteneste på Massing-Andersplassen i Åsen Kristi himmelfartsdag. Berre murane av våningshuset står igjen på den vesle buplassen. I tillegg til gudsteneste var det dåp.

Gudstenesta opna med songen «No livnar det i lundar» og vart avslutta med «Fagert er landet». Treffande songval i det fine veret og  med storfelt natur og utsikt.

Saga Emilie sin dåp vart krona med sol og varme. Og dåpsvatnet var tydeleg svalande i varmen, for den vesle jenta kneip godt fast i handa til døyparen, kanskje for å få fleire svalande dropar i panna.

Som tradisjonen er song Kristin Storstein velsigninga. Dåpsseremonien var ei vakker og stilfull handling.

Eigar av Rasmusgarden i Åsen, Roar Åsen ynskte kyrkjegåarane vel møtt og fortalde litt om Massing-Andersplassen og dei som budde der til rundt 1900.

Anders var i tillegg til brukar ein dugande massingsmed og rosemålar. Kona heitte Olave og dei fekk ni born som vaks opp der.

I Åsen er ikkje aktivt husdyrhald lenger. Roar Åsen var den siste mjølkeleverandør, det skjedde for 12 år sidan, fortalde han.