God støtte til Ljøbrekka
Ljøbrekkas Vener håper å få på plass eigenfinansieringa til opprusting av turvegen frå Ljøen til Herdal.
Kronerullinga til utbetringsarbeidet av den Trondhjemske Postvei over Ljøbrekka «rullar» godt framover. Til no har det kome inn 80.000.- kroner frå einskildpersonar og ca. 310.000.- kroner frå bedrifter, forlel leiaren i Ljøbrekkas Vener, Petter Hjørungdal.
-Det var ein periode eg lurte litt på om vi ville makte å få inn eigenkapitalen til prosjektet i tide, men no er eg meir optimist. Vi har budsjettert med hundre tusen i kronerulling så det målet trur eg vi vil klare. Vi tek sjølvsagt imot om det kjem inn meir.
Frå bedrifter har vi fått både små og store beløp, frå 10.000.- til 150.000.- kroner og det er flott. Vi jobbar med å få tilsagn frå fleire, men også kommune og fylke må nok hjelpe oss med støtte, trur Hjørungdal. Den driftige organisasjonen har frist på seg ut februar til å få eigenfinansieringa på rundt 700.000.- på plass.