Ljøkaia ved Nedre Ljøen er skada av ver og byljer frå sjøen. No er det gjeve løyve til å starte reparasjonsarbeid.

Styret i Geiranger – Herdalen Landskapsvernområde har gjeve Stiftinga Geirangerfjorden Verdsarv løyve til å restaurere Ljøkaia ved Nedre Ljøen i Stranda kommune. Kaia har fått synlege skader, spesielt i betongdekket, truleg etter bøljer og vasking av sjøvatn. Der er også påvist at stein i oppmuringa har glidd ut.

Med løyvet vert det sett fleire vilkår for utføring av arbeidet.

Ljøkaia skal restaurerast etter antikvariske prinsipp gjeve av Fylkeskonservatoren, knytt til byggeteknikk, materialval og utforming. Alt utstyr og materiale til arbeidet skal fraktast inn med båt. Restar av materiale skal fjernast, bortsett frå rustfrie bolkar i stein. Løyve for tiltaket må innhentast frå grunneigar og Stranda kommune før arbeidet startar.

hellesylt.info har fått opplyst tidlegare at arbeide med reparasjon av Ljøkaia skal starte opp i mars 2015.