Ikkje store «Tor»-skadar
Ekstremveret «Tor» råka for fullt i Sunnylven rundt klokka 17.00 fredag kveld. Men denne gongen vart bygda spart for store øydeleggingar.
Mange huska med skrekk besøket av «Dagmar» i romjula 2011. Då vart mellom anna kunstgrasdekket på heile Hellesylt stadion øydelagt, Hellesylt Camping og området kring såg ut som ei krigssone, og i tillegg vart resultatet mykje stormfelt skog og andre mindre øydeleggingar. Fredag frykta mange det skulle bli nye store skadar då det var varsla vindstyrke opp i orkan.
Så gale gjekk det ikkje. Som bileta viser gjorde «Tor» berre små øydeleggingar sjølv om vindkasta var heftige nok.
På Hellesylt knakk eit tre og øydela TV-kabelen til Sunnylven omsorgssenter. Denne er reparert og TV-bileta er tilbake som normalt. I ballbingen ved Sunnylven skule har deler av kunstgrasdekket krølla seg, og ei fiskarhytte ved Fløtehølen i Korsbrekkeelva har mista taket. Ei campingvogn og fleire tre har også velta i stormkasta, men andre større skadar har vi ikkje registrert.
Og bortsett frå tre korte straumbrot var el-forsyninga i Sunnylven inne under heile ekstremveret. Godt levert av Stranda Energi.
Alle foto: Gunnar S. Fivelstad.