Sju elevar hadde sin siste skuledag ved Sunnylven skule torsdag. Under sommaravslutninga fekk dei utdelt sine vitnemål for fullført grunnskule.

Rektor Torje Bjørneset hadde mange gode ord på vegen vidare då han delte ut vitnemåla til sju avgangselevar under avslutningsfesten på Sunnylven skule torsdag. Dei sju var Brede Ringdal, Julie Skjortnes Røyrhus, Gina Gausemel, Inger Ringdal Sæter, Malin Taraldset Fivelstad, Birgitte Hellebostad og Katrine Grov Øksvang.

Rektor Torje Bjørneset minte om at dei no var ferdige med grunnskulen og at ferda gjekk vidare ut i verda, ei reise han var sikker på dei ville greie godt. –De er flotte ambassadørar for bygda dykkar, sa han mellom anna og takka dei for at dei hadde vore hyggelege elevar gjennom ti år på Sunnylven skule.

Han delte ut vitnemåla og gratulerte dei alle. Det same gjorde kontaktlærar Egil Dolmen som saman med andre lærarar som har hatt klassa fekk blomar av elevane.