Etter 35 – års drift: SHELL-ANLEGGET LAGT NED

Sist veke vart anlegget til Shell i Bergane ved Korsbrekke demontert, og dermed er det slutt på ei 35 år lang drift ved dette anlegget.

For å få lyft ned dei to store tankane på tilsaman 75 kubikk, måtte ei kran på 30 tonn hentast hit frå Ålesund. Men då krana var på plass, gjekk det greitt å få lyft tankane av fundamenta og senka dei ned i fjøra. Her låg dei til ein slepebåt frå Ålesund kom og slepa dei med seg tilbake til byen.

Lars A Korsbrekke fortel til Sunnylvingen» at resten av fundamenta og kaia skal rivast i løpet av hausten. Når det gjeld grunnen der Shell – anlegget stod, så leigde Shell. Men leigekontrakta er her for lengst gått ut, og råderetten over grunnen er gått attende til grunneigaren.

I den første tida anlegget var i bruk, var her lagra bensin, og Ivar N Hole stod for utkøyring frå anlegget til eit stort distrikt særleg i Nordfjord. Seinare gjekk ein over til å lagre fyringsolje og diesel i tankane, og den siste som har stått for utkøyringa har vore Halvdan Lødemel frå Hornindal.

Etter det Sunnylvingen forstår, vil no Shell dekke området her med leveransar frå Ålesund for framtida.

Denne artikkelen er henta frå Sunnylvingen, oktober 1981