Det går mot ei helg med mykje song og musikk i Sunnylven. Skulekorpset bidreg aller mest med tunnelopning, nissespeling og under konsert i Sunnylven kyrkje.

Sunnylven skulekorps øver godt og har spela på seg ry mellom korpsinteresserte. Komande helg har det unge brassbandet fleire oppdrag, både for politikarar og andre under opning av nye Ljøtunnelen, dei vil skape julestemning for handlande på Hellesylt og ikkje minst bidra under den årlege julekonserten i Sunnylven kyrkje.

Graut og nissespeling

Det har blitt mykje øving i det siste. Under tunnelopning midt inne i den nye Ljøtunnelen laurdag 17. desember blir det akustikk og høgtid når Sunnylvsmarsjen og Ja vi elsker blir framført.

Frå opninga returnerer korpset til Sunnylven skule og julegraut. Korpset hadde eigentleg slått frå seg graut og nissespeling i år grunna tunnelopninga, fortel leiar i styret for korpset, Anita Langeland. Men mange gav uttrykk for at dette er ein viktig og kjekke tradisjon, og då blir det slik også i år, seier ho. Dermed blir det nissespeling ved butikkane på Hellesylt laurdag frå klokka 14.30. Anita Langeland håper mange kjem for å høyre flott julemusikk, kome i god julestemning, og kjøpe tombolalodd, restar frå juletombolaen til korpset fyrste helga i advent.

Julekonsert i kyrkja

Søndag deltek Sunnylven skulekorps under julekonserten i Sunnylven kyrkje. Arrangør er Sunnylven sokneråd, og konserten vil også i år vise at Sunnylven har eit blomstrande song og musikkliv. I tillegg til korpset deltek Hellesylt songlag, Joyful, Felegruppa og andre frå skulen. Songinnslag under julekonserten byd på mellom anna kjende og kjære songar som Det lyser i stille grender, Chrismas song, til nyare juletonar med Himlen i min favn og Himmel på jord. Konserten er søndag 18. desember klokka 20.00.