Rådmannen tilrår at Sunnylven skule framleis vert 1. – 10. skule

Etter ein lang og omfattande prosess nærmar saka om skulestrukturen i kommunen seg politisk handsaming. Rådmannen tilrår no at Sunnylven skule får halde fram som ein 1.- 10. skule og at skulebygget vert renovert i tråd med investeringsplanen.

I si innstilling peikar rådmannen på at Sunnylven skule vil få ein nedgang i elevtalet, men at der vil vere nok elevar til å halde oppe eit fagleg og sosialt miljø for elevane. Rådmannen ser det og slik at belastninga ved lang reiseveg er større en vinsten elevane kan få ved å vere i eit større læremiljø.

Bekymringa vil nok vere om ein i framtida greier skaffe nok  lærarar med nødvendig fagkompetanse.
– Utlyste stillingar i år viser at det er ein auke i kvalifiserte søkjarar samanlikna med dei siste åra, skriv rådmannen, som og drøftar nokre konsekvensar ei nedlegging av ungdomssteget ved Sunnylven skule kunne få.

Skulebygget i Sunnylven må no renoverast for at ein i framtida skal drive skule der. Midlar til oppstart av dette arbeidet er sett av i investeringsplanen i 2018.

Les heile høyringsdokumentet på Stranda kommune sine nettsider.