Sunnylven skyttarlag tilbyr å starte opp skyteskule for damer. I fjor arrangerte skyttarlaget skyteskule for ungdom.

Etter ønskje frå fleire vurderer Sunnylven skyttarlag å starte opp ein skyteskule for damer på miniatyrbana i klubbhuset ved Hellesylt stadion. I fjor arrangerte laget skyteskule for ungdom og då fekk laget spørsmål om å arrangere det same for damer. No blir det ein realitet om nok deltakarar melder seg på.

Leiar i skyttarlaget, Ola Vangen seier det må vere mellom fem og tolv deltakarar for å kome i gong. Fleire har vist interesse for skytekurset etter at tilbodet vart kunngjort gjennom facebook nyleg. Skulle det bli for få damer vil det bli vurdert å opne for menn som er interessert i å delta, seier skyttarlagsleiaren.

Kurset vil gå over fem kveldar på miniatyrbana til Sunnylven skyttarlag. Pris for heile kurset er kr. 500.- som dekkjer ammunisjon, utstyr og skivemateriell. Påmeldingsfrist er 28. oktober, til olavangen96@gmail.com, eller til mob. 944 35 850.

På skyteskulen vil det bli instruksjon i eitt tema kvar kveld, sikting, pusting, skytestilling, avtrekk, og reglar for sikkerheit ved bruk av våpen.

-Høyrest dette spanande ut? Ta kontakt om det fortsatt er damer i bygda som er interessert å delta på skyteskule, seier Ola Vangen.