Bygdekvelden «Det store i det litle» nærmar seg, eit arrangement der betydninga av godt, friviljugt lagarbeid i Sunnylven blir sett i fokus.

Vesle Sunnylven med sine 6 – 700 fastbuande har mange lag og organisasjonar. Alle driv gode trivselstiltak der det er tilbod for alle generasjonar, liten og stor. Å takke lag og personar som står bak alt som skjer og der døgnet nesten har for få timar blir ofte gløymt. Men laurdag skal lag og organisasjonar med tillitsvalde heidrast for oppofrande innsats.

Det var Jens Vik, for mange år innflyttar til Sunnylven som kom opp med tanken om å arrangere ein Bygdakveld med framsnakking av bygdefolket og i tillegg servere kulinariske opplevingar. Laurdag 10. november er Sunnylven samfunnshus samlingsstad og i arrangørstaben har han med seg to andre sambygdingar, Geir Frøysa og Jan Ove Tryggestad. Men også fleire andre er klar for innsats på sjølve kvelden.

Programmet på laurdag blir korte presentasjon av ti lag og organisasjonar i Sunnylven i tekst og bilete, og det kjem nokre helsingar frå utflytte sunnylvingar. Torunn L. Tryggestad, seniorforskar i PRIO er tilbake på Hellesylt denne kvelden og vil i eit innlegg snakke om oppveksten sin på Hellesylt.

Song og musikklivet er rikt i Sunnylven og frå scena spelar ungdomsbandet Kilt med bandmedlemer frå Sunnylven ungdomsskule opp med poplåtar både vokalt og instrumentalt.

I jordbruksbygda Sunnylven blir den kulinariske opplevinga servering av ulike rettar av sau, tilberedt av meisterkokk Lars Helge Hanssen som har sine slektsrøter frå Nibbedalen, og som til dagleg jobbar ved Finnøy Havstuer. I tillegg blir det servert kaffi og dessert.

-Bygdakvelden er ikkje eit arrangement for dei som har flytta ut frå bygda, men ein kveld for dugnad og friviljugheit i Sunnylven der vi får lov å gje og få ros, og skryte litt av oss sjølve. Gode lag og organisasjonar i heimbygda har gjeve mange både utflytte og fastbuande ein god ballast i livet. Kanskje er det difor dei har lukkast og samtidig profilert Sunnylven på ein god måte, seier Geir Frøysa og Jens Vik.

I Sunnylven samfunnshus laurdag 10. november blir det dekka opp til maksimum 200 personar, så ikkje utset kjøpet av billettar. Dei blir selde på førehand på dei to butikkane Joker Ringdal & Co, eller Coop Marknad på Hellesylt og pris er kr. 100.- for vaksne, under 18 år er inngang gratis. Eventuelle restbillettar blir å få kjøpt ved inngangen.

-Vi er veldig spente på denne sosiale bygdesamlinga og håper på godt frammøte og på tvers av generasjonar, seier dei to, Jens Vik og Geir Frøysa.

For spørsmål i samband med Bygdakvelden, ta kontakt med Jens Vik, mob. 480 56 420, e-post: jensvik@hotmail.com