Tradisjonsmatskulen

Elevar frå 8. og 9. klasse fekk lære seg å lage potetball av bygdekvinnelaget. Her er nokre av dei 13 elevane som også stod for borddekking og servering torsdag.

På potetballdagen ved Sunnylven skule fekk elevane i 8. og 9. klasse vere med på å lage potetball. Og det var ikkje «juksepotetball», men av poteter, skrella og raspa.

Tradisjonsmatskulen er eit prosjekt i Norges Bygdekvinnelag med mål om å lære mellom anna born og unge om mattradisjonar og matkultur.

-Sunnylven bygdekvinnelag har i mange år servert potetball til elevar og tilsette ved Sunnylven skule. I høve tradisjonsmatskulen fekk vi ideen om å lære to klassetrinn ulike måtar å lage potetball på. I år inviterte vi elevane frå 8. og 9. klasse, 13 i alt til å vere med å lage potetball. Vi delte dei i to grupper og laga potetball slik den har blitt laga av raspa poteter. Dei var både flinke og læreviljuge, fortalde leiar i bygdekvinnelaget Anne Grete Hjelmeland hole.

Oppskrifta.

Her er oppskrifta for den som vil lage ekte potetball, til tre personar:

Poteter: ca. 800-1000 g.

Byggmjøl: 2 dl.

Kveitemjøl: 2-3 ss.

Salt: 1ts.

Evt. Dott av flesk eller ein bit av mør.

Rasp eller mal potetene. Bland i resten av ingrediensane. Prøv deg fram med ein ball. Om røra er for tynn, juster med meir kveitemjøl. Kokast i kraft ca. 45. minutt. Server med: Salt kjøt, pølse, steikt flesk, kålrot, gulrot, poteter, sirup, saft, sur eller søt mjølk.

 

 

Fredrik Stadheim

Fredrik Stadheim

Fredrik Stadheim. epost: fredrik@hellesylt.info Telefon: 900 83 380