Ole Arnstein Ringdal hevdar han fekk sjokk på fisketur i Fløtehølen torsdag kveld. Heilt uventa vart det fast fisk, ein rugg på ti kilo.

-Mykje snøsmelting har gjort at Korsbrekkeelva har vore stor dei siste dagane. -Eg sa det, det blir nok ikkje laks i dag, elva er for stor. Men det vart ikkje mange kasta med fiskestong og meps før eg kjende at det var fisk på kroken, og på land kom årets tredje laks i Korsbrekkeelva i år, ein rugg på 10.0 kilo. Eg var lettare sjokka etterpå.

Ringdal har erfaring med at laks går opp i elva når det er stor vassføring, men at det sjeldan blir fast fisk å få. Når elva renn sti blir det også få plassar å fiske på, seier han. Men i Fløtehølen er det litt rolegare, og her var det altså at storlaksen beit på noko så smaklaust som ein meps, ein metallsluk.

Ole A. Ringdal har nye fiskedagar. -Sjokket etter den uventa fangsten har lagt seg, nervar og puls har roa seg og eg er klar for nye kast og ny storfangst, er siste kommentar frå storfiskaren.