Byggjer konkurranseform på rulleski og med fjellturar

James Clugnet drog i tet under stakeøkta opp Steimsåsane og vidare mot Vollset torsdag. Forma er stigande for den unge GB-løparen.

Dei engelske og norske langrennsløparane som trenar i Sunnylven er kome over halvvegs i samlinga. Torsdag var det staking intervall på rulleski før fjelltur til Kløyvingsnibba 1331 m.o.h.

Tre britiske Andrew Musgrave, Andrew Young og James Clugnes, og Simen Hægstad Kruger og Kasper Stadaas frå Norge er alle toppløparar for sine land. Og under trenarane Jostein Vinjerui og Hans Kristian Stadheim har dei gjennomført to hardøkter kvar dag, på rulleski og bratte fjellturar. Ver, temperatur og opplegg har vore fantastisk bra, så godt at Andrew Musgrave meinte dei kunne avlyse andre samlingar og legge alle til Sunnylven og Hellesylt.

Fyrste dag søndag starta med ei lett rulleskiøkt, før det vart meir fart og hurtigdrag dagen etter.
På tysdag var Norangsdalen arena i tre timar på rulleski, og med 870 meter høge Åsenakken som kveldstur.
Onsdag starta med motbakkeløp frå kaia på Ljøen til Ljøbrekka. Turråsa som Ljøbrekkas vener har sett i stand fekk  mykje skryt. Ei utruleg flott løype for løping i motbakke, var den samstemte kommentaren.

Oppe på flata etter 130 meter stigning og staking. Andrew Young i tet føre Simen Hægstad Kruger, Kasper Stadaas og Andrew Musgrave som er akillesoperert for sju veker sidan.

I tillegg til variert terreng har alle på samlinga hatt tilgang til Hellesylt treningssenter og styrketrening der. Og løparane har prøvd fiskelukka i Bygdaelva som renn like forbi campinghyttene der dei bur. Det har blitt nokre fine ørretar, frå 0.3 til 0.7 kilo, har vi fått oss fortalt.

 

 

 

Fredrik Stadheim

Fredrik Stadheim

Fredrik Stadheim. epost: fredrik@hellesylt.info Telefon: 900 83 380