I fjor vart rasteplass med bålpanne laga til på toppen av Verdegjølet i Sunnylvsbygda. No er også rastebenkar kjøpt inn og utplassert.

Snøen er borte på den gamle bygdevegen over Vardegjølet, ein fin turveg for både unge og eldre med flott og varierande utsikt.
Fram til nyevegen i Berga kom på 1940-talet, delevis skoten inn i bergveggen, var vegen frå Rindekroken på Frøysa til Hole ferdselsåra mot øvste delen av Sunnylvsbygda.

Vedlikehaldet av gamlevegen vart lite påakta, men etter søknad fekk idrottslaget i 2020 ein del korona-middlar til utbetring og vedlikehald. Tilskotet har gått til rydding av skog, grøfter har blitt rensa, og på høgaste punktet med elvejuvet 50 – 60 meter under kom det opp eit solid gjerde. Her vart det også laga til ein rasteplass, ein grillplass med bålpanne og steinbord.
Nyleg kom det også på plass fleire rastebord som folk kan nytte når dei vil «ykte» på under turen.

Pådrivar i arbeidet med det nye, flotte turtilbodet har vore Inge Bjørdal.
-4-H var her og hjelpte med ein del skogrydding, men stort sett er arbeidet utført av nokre få personar med eit mål om å bevare eit flott turtilbod i nærmiljøet. Det har blitt eit tresifra antall dugnadstimar i prosjektet som no er ferdig, seier han.

Arbeidet med turvegen over Vardegjølet er no avslutta, eit turtilbod som har det meste, god og trygg å gå på, spektakulær natur med variert vegitasjon, eit høge elvejuv sikra med gjerde, og grillplass med benkar og bålpanne. Alt er til fri bruk for den som vil, seier Inge Bjørdal som håper mange vil finne glede av å bruke den gamle vegen over Vardegjølet.