Olav Erling Aaland gjorde eit kjempeløp i Oslo halvmaraton laurdag. Han kom i mål til 40. plass og tida 1.14.25. I Ålesund vann Kari-Anne Tryggestad Ryste si klasse i maraton.

Sunnylven IL sine langdistanseløparar er i god form. Olav Erling Aaland kniva skarpt med fleire toppløparar i Oslo halvmaraton laurdag, og i Ålesund maraton over vel 42. km. vann Kari-Anne Tryggestad Ryste suveren i si klasse.

NM-løp

Oslo maraton var også NM-distanse og vart arrangert på brustein og asfalt , eit brutalt underlag utan god trening. Olav Erling Aaland deltek for Sunnylven IL og sprang halvmaraton i klasse M 24-34. Han vart nr. 40 totalt med sluttid 1.14.25 som er ny klubbrekord for Sunnylven IL i Oslo halvmaraton. Tidlegare har Hans Kristian Stadheim fullført på 1.17.01.
Vinnar av løpet i år vart Sondre Norstad Moen, Ros IL, 1.02.43, føre Marius Vedvik, Gular IL.

Klassevinnar i Ålesund maraton

Kari-Anne Tryggestad Ryste deltek også for Sunnylven IL i lange og fleire maraton-løp i løpet av sesongen. Mellom anna vart det siger i Nibbeløpet i Geiranger i august.
Laurdag stod Ålesund maraton på programmet, og sjølvsagt vart det lengste distanse på Kari-Anne.
Ho innkasserte ein ny siger i klasse K 50-54 på tida 3.29.58. Det vart 15. plass totalt uansett klasse og kjønn. Berre Ida Furnes Brevik, Ålesund (K23-34) var raskare dame i Ålesund maraton i år.
Vinnar av herreklassa vart Johannes Alnes Løkkeborg.