Redaktøren i hellesylt.info var nok litt kjapp med å utrope innehavaren av klubbrekorden på halvmaraton. Ein lesar har gjort oss merksam på gode tider av ein annan sunnylvsløpar.

Inge Røyrhus var ein av mange gode i løps-miljøet til Sunnylven IL på 80-talet. Han gjorde mange gode maratonløp, mellom anna straffa han tida til Aaland under Oslo maraton i 1988, har vi fått opplyst..

Inge Røyrhus skriv sjølv om nokre av maratonløpa her:

-Beste resultatet mitt på halvmaraton, var i Oslo i september 1988. Eg hugsar ikkje datoen, men eg trur det var andre helga i september, på laurdagen.

Då sprang eg på 1 time 12 min. 48 sek. Det var nokså «tøff» opning, med første kilometeren på 3.15 minutt, slak motbakke opp frå Bislett stadion. Etter kvart roa det seg ned litt, så eg kom i eit bra felt. Første 10 km passerte eg på 33.10, og det gjekk litt saktare etter kvart, men etter 20 km hadde eg 1.08.55. Sluttida på 1.12.48 heldt til 37. plass i klasse 30 – 39 år, og 79. plass totalt. Det eg tykte var litt stas, var at i same klasse som eg deltok i, var ein mann med namn Ivar Formo, SK Lyn. Han kom i mål på litt under 1 t. 14 min. (hugsar ikkje akkurat tida). Han hadde for lengst avslutta si aktive karriere, men var ein aktiv mosjonist.

Andre halvmaratontider: I 1986 sprang eg i Drammen på 1.14.27, og eg hadde eit løp i Trondheim på mellom 1 t. 14 min. og 1 t. 15 min.

Molde halvmaraton gjennomførte eg eit år på 2. plass med 1 t. 16 min. 15 sek. I 28 varmegrader. Orienteringsløparen Tore Sagvolden vann det løpet.

Maraton har eg gjennomført 2 gongar, begge i Drammen. I 1987, med dårleg grunnlag, kom eg i mål på 2 t. 57 min. 50 sek., etter å har gått på ein smell etter 26 km. Det var eit ork å kome seg vidare, men uaktuelt å bryte.
Klok av erfaring hadde eg eit betre grunnlag i 1988. Då var det NM i maraton i Drammen, 2. oktober. Då kom eg i må på 2 t. 40 min. 58 sek. Det heldt til 12. plass i klasse 19 – 34 år, og 32. plass totalt.