Laurdag og søndag er det KM i skiskyting i Hyttehola, ski -og skiskyttaranlegget til Sunnylven IL like ved Tronstad. Vermeldingane kunne vore betre, men det blir rapportert om gode snøforhold i anlegget.

Det er ski -og skiskyttargruppa i Sunnylven IL som er arrangør av KM -øvingane i skiskyting. Fem klubbar som er tilslutta Sogn og Fjordane skiskyttarkrins deltek i KM, Markane IL, Hardbagg IL, Stårheim IL, Volda turn & IL, og Sunnylven IL.

Lisbeth Lervik Helset er nestleiar i skiskyttargruppa til arrangøren og styremedlem i skiskyttarkrinsen.
Ho fortel at til rennet i Hyttehola laurdag 5. februar og søndag 6. februar er det meldt på 53 løparar i alder frå 8-9 år til senior.

Sprint begge dagar

Laurdag er det sprint enkeltstart alle klasser. På søndag er det fortsatt sprint med enkeltstart for alle deltakarar yngre enn 13 år, klasser som er eldre går ut som fellesstart.
Det blir delt ut KM-medaljer i alle klasser frå 13 år og eldre, fortel ho.

Redusert deltaking grunna korona

Arrangøren Sunnylven IL ski -og skiskyttargruppe stiller med 11 deltakarar laurdag, og 10 på søndag, mellom anna med ein av favorittane i M17, Elias Helset. Han er elev ved Stryn vidaregåande skule og får tøff konkurranse frå medelevar. Skulen kjem med 4 av 5 deltakarar i årsklassa.

Lisbeth Lervik Helset er spent på gjennomføringa av meisterskapen grunna korona-pandemien som ho veit har slått til hos alle klubbane som deltek. Under konkurransane kan kvar deltakar ha med ein hjelpar, men det kan fort blir nokre forfall, trur ho..

Ikkje for publikum

Konkurransane er ikkje opne for publikum grunna covid, men om nokon gjerne vil sjå løparar i aksjon oppmodar ho om å halde god avstand og bruke munnbind.
-Det er litt kjedeleg for oss også som arrangør at ikkje publikum kan ha tilgang og heie på sine favorittar, men slik har det blitt, til så lenge, avsluttar Lisbeth Lervik Helset.