Langrennsjenta Kristine Hjellbakk Hole var i god form og hadde trua på gode resultat i langrenn under junior-NM. Men så kom korona-viruset på besøk og dermed vart det ingen start i løypene på Nes.

Vi leita lenge i resultatlistene frå junior-NM, men fann ingen Kristine Hjellbakk Hole, sunnylvsjenta som no representerer Lillehammer skiklubb. Omikron og korona-viruset kom og stoppa all deltaking for Kristine.

Var i form

-Det var skikkeleg kjedelig, eg hadde gleda meg så mykje til å delta i junior-NM i år, er følte at eg var i god form der og då, men med feber, slappheit og hoste var det berre å gløyme deltaking og ta det med ro. At også andre, mellom anna fleire av OL-deltakarane fekk føle viruset var på ein måte ei lita trøst sjølv om eg langt frå unner andre å bli sjuke, seier Kristine på telefon frå Beitostølen.

Gjekk Norgescup

Ho kom seg i trening igjen ganske fort, men har teke det litt roleg etter råd frå trenarane. Sist helg var ho mellom deltakarane under Norgescup i Steinkjer i klasse K 19/20. Der gjekk ho både sprint, og distansar i klassisk og skøyting og kom i mål til plasseringar rundt nr. 30.
Resultata vart som ho forventa etter treningsavbrekket, men ikkje så bra som ho ønska seg. Ho har høgare mål i langrenn enn midt på resultatlista, forstår vi.

Ledsager under Ridderrennet

No trenar ho godt igjen for å kvesse forma til dei siste renna i Norgescupen på Lygna 8. og 9. april.
Denne veka er ho og fleire frå skulen i Lillehammer på Beitostølen under Ridderrennveka. Her er Kristine og fleire andre hyra inn som ledsagarar for svaksynte og andre med handikap. Og søndag går sjølve Ridderrennet så då må alle ha lært seg terreng og løyper, legg Kristine til.

Godt langrennsmiljø

Kristine Hjellbakk Hole skal satse for fullt på langrenn også til neste sesong, og truleg går ho for Lillehammer skiklubb også då.
-Her er eit fantastisk flott langrennsmiljø som eg trivast godt i, og med mange gode trenarar, seier Kristine Hjellbakk Hole.