På Kulturbedehuset på Hellesylt blir det søndag 7. august nærmare presentasjon av diktaren Ivar Ringdal. Det er Asbjørn Tryggestad som kåserer om diktaren og småbrukaren frå Ringdal.

Leiinga for den lokale Verdsarvutstillinga har vedteke å presentere litt nærmare ein del personar som er presentert i utstillinga på Kulturbedehuset på Hellesylt, ei utstilling «Med naturen som inspirasjon».
Tidlegare i sommar var det Kjellstad-spelemenn som fekk omtale i eige arrangement i Kulturbedehuset der felespelar Britt Pernille Frøholm frå Hornindal drog opp fleire slåttar på fela si av Ivar og Ola Kjelstad og fletta kommentar til. Det vart eit populært arrangement som fylte bedehuset.

Diktaren Ivar Ringdal, eller «Lellen» er mellom fleire sunnylvingar som har fått plass i utstillinga i bedehuset på Hellesylt.

Søndag 7. august kjem Asbjørn Tryggestad og fortel om diktaren i eit kåseri han har kalla «Dikta til diktaren og småbonden Ivar Ringdal – ein undervurdert poet».

Dette blir siste samling med nærmare presentasjon av personar i år. Til neste sommar blir det nye, lovar arrangøren.