Sunnylven pensjonistlag har halde styremøte og sett i hop program for hausten, triveleg og godt både som underhaldning og for smakssansane.

Vi tok ein telefon til leiar i Sunnylven pensjonistlag og fekk oppdatering frå siste styremøte i laget. Her er det meste av det styret vedtok:

Det blir ny balldag på Hægstad Gård / Geiranger bakeri torsdag 8. september, sikkert ei gla`nyheit for mange, trur vi. Og blir serveringa som den har vore tidlegare føl det med både salt kjøtt, pølse, kålrot og poteter saman med potetball på tallerkenen.

Vi har omtala konserten med Sigrid Moldestad fredag 30. september på Sunnylven samfunnshus annan stad, men minner om at billettar får ein kjøpt på førehand ved Stranda bokhandel og Joker Hellesylt. Det blir sal også ved inngangen frå klokka 19.30 på konsertkvelden.

Torsdag 20 oktober blir det samling på Sunnylven kyrkjelydshus. Der skal det smakast på årets fårikål, seier Astrid Langeland og ho lovar at dei frammøtte skal få både riskrem og kaffi etterpå.
Til samlinga på kyrkjelydshuset kjem også Asbjørn Tryggestad. Han fenga eit stort publikum med kåseri om diktaren Ivar Ringdal på kulturbedehuset nyleg, men denne gongen kåserer han om barne -og ungdomsminne frå heimbygda Sunnylven.
Under dette medlemsmøtet blir det åresal.

Fredag 18. november er det fem veker igjen til jul og då er det på tide med julebakst, meiner styret i pensjonistlaget. På kyrkjelydshuset blir det førjulstreff og der skal det bakast kromkaker og anna julebakst av damene, og karane skal steike og servere vaflar og kaffi. I tillegg skal vi øve på julesongar, fortel Astrid. Ho håper mange blir med på førjulstreff og trivelege timar på kyrkjelydshuset.

Tidleg i desember blir det som vanleg julebord i Sunnylven pensjonistlag. Dagen er ikkje fastsett enno, men blir kunngjort når avtale om hus og matservering er avklara.