Måndag 3. oktober tok Ingvild Parr til i sin nye jobb som assisterande butikksjef ved Coop marked Hellesylt. Ho gledar seg til å jobbe på Hellesylt, i heimbygda til slektsrøtene.

Ingvild Parr bur på Stranda saman med sambuar og to eigne og to bonusbarn.
Ho har brei erfaring frå yrkeslivet, mellom anna er ho utdanna innan journalistikk og har jobba som redaktør ved ei lokalavis på Sunnmøre.

Også butikk og kundebehandling er ho vand med frå Coop-butikk ved Bislett i Oslo der ho var i fire år. Ho har med andre ord kjennskap til Coop-systemet når ho no blir assisterande butikksjef på Hellesylt.
Etter at ho og familien flytta heim til Stranda for å kome nærmare slekta har ho jobba ved bensinstasjonen Esso på Stranda.

Ingvild Parr er veldig glad for å ha fått jobb ved Coop marked på Hellesylt, i bygda der slektsrøter kjem frå. På Bjørdal i Sunnylvsbygda har dei sommarhus, og i sætredalen har familien hytte som blir brukt ofte.

Ingvild blir buande på Stranda og skal pendle til Hellesylt. Det skal gå greit, det tek ein liten halvtime etter god og rastrygg veg, seier ho.
-Å ta til i ny jobber er spanande, både med nye utfordringar og ikkje minst treffe nye folk, men eg gler meg, seier ho.

Butikksjef ved Coop marked Hellesylt, Michelle de Vries er glad for å ha fått Ingvild Parr som assisterande butikksjef i 80 prosent stilling. Frå før har ho fleire flinke medhjelparar, men å få ein assisterande butikksjef er ei tryggheit, seier ho.
-No skal Ingvild få gjere seg godt kjent med butikken og så vil ho få opplæring i butikken sine rutiner. Eg føler ei tryggheit i å få ein medansvarleg, og no skal vi på Coop gjere alt for å tilby kundane det beste, ikkje minst god julehandel når den startar om litt, seier Michelle de Vries.