Påskebingoen med premieutdeling for Sunnylvscup på ski vart godt besøkt. Her vart også rundt 60 unge skiløparar premierte for deltaking i cuprenn både for 2022 og 2023.

Det vart svært så folksamt under premiefesten for Sunnylvscup på ski tysdag i påskeveka. Både den store og den vesle salen i samfunnshuset var godt besatt av unge og litt eldre løparar og bingospelarar. Her var dei fleste som hadde delteke i Sunnylvscup på ski sist vinter.

Det var premieutdeling også for vinteren 2022 då det ikkje vart arrangert påskebingo det året grunna korona-pandemi.

Linn Kammen og Magnar Tufte Tyssen stod for utdeling av medaljer til løparane. Innleiingsvis takka dei to for det gode frammøtet som cupen hadde hatt både i fjor og vinteren i år. Dei retta også takk til mange andre, løparar som hadde delteke, løypekøyrarar, tidtakarar, til hjelparar i kiosken, og andre som hadde bidrege til å få fleire skicup-arrangement trygt og godt i hamn.
Deretter var det utdeling av gullfarga medaljer, både for i fjor og i år. Rundt 60 jenter og gutar hadde delteke i cupen begge åra, og no fekk dei sine bevis på fullført deltaking.

Skicupen med bingo er eit stort arrangement kvart år i påskeveka. Slik vart det også denne gongen med fulle salar i heile Sunnylven samfunnshus.