I morgen fredag 2. juni er det konsert med kulturskuleelevar på Sunnylven samfunnshus. Konserten er open for alle.

Det blir rikt og variert program med song og musikk når kulturskuleelevar frå Sunnylven skule inviterer til konsert på Sunnylven samfunnshus fredag 2. juni. Der blir det litt for ein kvar smak av musikk på fleire instrument, og kanskje song.

Lærar Erik Torset er mellom ansvarlege for konserten og opplegget. Han fortel at det blir innslag av Sunnylven skulekorps, og av fleire elevar på ulike instrument.
Repertoaret er variert, mellom anna lovar han eit par Bjørn Eidsvåg-songar i litt nyare drakt.

Under konserten blir det også besøk av Ådne Kjellstadli, ein tidlegare elev ved kulturskulen og Sunnylven skule som no går i Volda. Han var aktivt med under 17.-maifeiringa på Hellesylt i år der han spela piano til allsong.

Musikklærar Erik Torset håper mange tek turen til konserten som er fredag 2. juni frå klokka 19.00 og utover. Det blir sal av kaffi og kaker.