Sunnylven G14 møtte Hødd til seriekamp på Hellesylt stadion tysdag. Det vart ein spanande kamp der heimelaget låg under, men kom sterkt og sigra til slutt, to minutt før full tid.

Det vart fartsfylt og tøffe duellar på Hellesylt stadion då Sunnylven og Hødd sine G14-lag møttest til kamp tysdag kveld. Oppgjøret vart leia av dyktige Odd Even Svindseth, VRF som dommar.

Sunnylven opna best i denne kampen og alt etter fem minutt stod det 1-0 etter skåring av Sander.
Men det skulle ikkje gå meir enn 90 sekund før utlikninga kom. Dermed var målfesten i fyrste omgang i gong, spesielt for Hødd som gjekk opp til 1-3 før domaren bles til pause.

Og gjestane kom godt i gong også i andre omgang. I det sjette minutt donka dei inn nok eit mål og leia stort.
Men då «vakna» Sunnylven for fullt eit minuttet seinare. Då skåra Ari fyrst til 2-4, og like etter kom to kjappe frå Oskar. Klokka viste berre 11 minutt ut i andre omgang og laga var like gode på 4-4.

Spelet bølga fram og tilbake og 20 minutt ut i omgangen kom ny skåring til Hødd. Det var siste målet dei banka inn bak Sunnylven sin burvaktar i denne kampen.
For heimelaget var det ikkje slutt, dei gjorde to mål til og vann til stor jubel frå eit talrikt publikum.
Fyrst sette Sander inn sitt andre mål for kvelden, og til slutt dundra Trym inn 6-5. Då var det god stemning på Hellesylt stadion.

Hødd har fleire G14-lag. Dette var forsterka til kampen på Hellesylt, mellom anna med ny og svært god burvaktar, men som ikkje kunne hindre nok eit tap i haustsesongen. Tysdag kom det tredje.

Heimelaget gjorde ein ny, god kamp med få spelarar og stor aldersskilnad, frå 11 år til 14-15. Det var imponerande og stor innsats frå alle denne kvelden på ein våt og kjøleg Hellesylt stadion.
Å vinne over Hødd er godt jobba, synest vi!