Eit talrikt publikum fekk høyre fleire melodiar frå den såkalla «raudeboka» fredag kveld då Sunnylven skulekorps inviterte til konsert i Sunnylven samfunnshus. No blir julemelodiar på programmet.

-Vi har øvd mykje på grunntrening og melodiar frå «raudeboka», sa dirigent Trond Otto Berg innleiingsvis på konserten fredag kveld 3. november. Der fekk eit talrikt publikum høyre at dei 12 musikarane i Sunnylven skulekorps er i rute, og dei har fire aspirantar som også skal inn i korpsrekkene når notar til årets julekonsert blir leita fram.
Dirigent Trond Otto Berg lova alle fire plass i korpset når juleprogrammet skal øvast inn.

Sunnylven skulekorps opna konserten fredag kveld med to melodiar, fyrst ein balade og så ein Løvland-låt «Your raise me up». Deretter kom dei fire aspirantane med eiga avdeling.

-Neste øving er dei med dei eldre i korpset og då er det julesongar som står på programmet, sa Trond Otto Berg. Dei fire spela både Abba-låtar og meir, tonar som viser at det gror stadig fram nye musikarar i Sunnylven skulekorps.

Og det var ikkje berre frå blåseinstrument det let vakkert under konserten fredag kveld.
Etter ei god matøkt med kaffi, saft og gode kaker kom to jenter frå korpset på scena for å spele på piano. Fyrst ut var Ane Brenne Ringdal med leikne fingrar på pianotangentane , og deretter var det Siril Kjellstadli som hadde valgt seg ein Abba-låt. Imponerande og vakkert frå begge to.

Den såkalla «raudeboka» vart flittig brukt denne kvelden. Her fann korpset mange inspirerande og kvikke melodiar som publikum applauderte stort av. Sunnylven skulekorps er i rute, det viste dei som avslutning i «Sjung» der Ari imponerte stort på slagverk.

Sunnylven skulekorps er ikkje av dei store med sine 12 musikantar, men som til jul får tilgang på fire aspirantar. Men du verden kor hyggeleg det er å høyre dei spele slik dei gjorde under konserten fredag kveld i Sunnylven samfunnshus. Mykje ros deler dei også med dirigenten Berg som fekk overrakt blomar og gode ord frå korpsleiar Oddbjørg Stadheim til slutt under haustkonserten.