Heile 400 store og små gevinstar hadde Sunnylven skulekorps utstilt under lotteriet fyrste søndag i advent. Seinare same dag vart det julegrantenning og gudsteneste i Sunnylven kyrkje.

Det vart som vanleg folksamt på Sunnylven samfunnshus før julegrana i Hellesylt vart tent søndag 3. desember. På Sunnylven samfunnshus var folk samla og støtta opp om tombolaen til skulekorpset, så godt at etter 90 minutt var alle dei 400 gevinstane borte og korpset var mange tusen kroner rikare.

Etter tombolaen vart julegrana i Hellesylt tent. Sunnylven skulekorps stilte som vanleg opp og spela fleire av dei kjente julesongane, og mange gjekk sine rundar kring det lysande grantreet på Ole Ringdal`s plass. Frammøtte var godt på den flotte fyrste søndag i desember sjølv om kuldegradene beit godt. Men julehøgtida var på veg til Hellesylt.

Julestemninga heldt fram, og frå samfunnshuset drog unge og gamle til lysmesse i Sunnylven kyrkje. Varmerøra i kyrkja hadde kobla seg ut av ukjent årsak, så det var eit kjøleg kyrkjerom med temperatur mellom 9 til 11 grader, fekk vi opplyst. Men lysmessa vart gjennomført som planlagt, her deltok neste års konfirmantar med skriftlesing og lystenning, det vart mykje vakker song og musikk, og ei ny, god preike av sokneprest Ann Kristin Langeland.

Langeland minte om dei neste samkomene i kyrkja, 17. desember er det julekonsert klokka 20.00 med lokale song og musikkrefter, på julaftan blir det gudsteneste klokka 16.00, og på fyrste juledag er det gudstenest klokka 11.00. Ho håpa mange tok turen til kyrkja også då.